Бөйрөктүн УЗИси

Бөйрөктүн УЗИси адатта табарсыкты кароо менен бирге жүргүзүлөт - бул бүт заара чыгаруу системасынын абалын баалоого мүмкүндүк берет. Бөйрөктү ультраүн менен изилдөө органдын анатомиялык жайгашуусун аныктоого, бөйрөктөрдүн чоңдугун, паренхиманын, кыртыштын калыңдыгын жана тыгыздыгын, контурларынын тактыгын өлчөөгө, заара-таш оорусун так диагностикалоого, шишиктерди аныктоого мүмкүндүк берет.

Бөйрөктүн УЗИсин жүргүзүүгө көрсөтмөлөр:

1. бел аймагында, оң же сол капталда оору болгон даттануулар

2. зааранын лабораториялык анализдериндеги өзгөрүүлөр

3. бөйрөктүн сезгенүү ооруларынын өнүгүшүнө шек болуу

4. артериялык кан басымынын жогорулашы

5. беттин жана буттардын шишимиги

6. заара-таш оорусунун белгилери

7. шишиктерди диагностикалоо

8. себеби белгисиз узакка созулган гипертермия (дене табынын көтөрүлүшү), өзгөчө балдарда

9. жаракаттардан, белдин жана курсак дубалы аймагынын урунуп жабыркашынан кийин

10. бөйрөк трансплантациясынан кийинки көзөмөл

11. заара чыгаруу системасынын жүргүзүлүп жаткан дарылоого реакциясын көзөмөлдөө

12. зааранын агымынын бузулушу, заара чыгарууда оору

13. бөйрөккө жасалуучу операцияларга даярдоо

14. заара системасынын тубаса патологиялары

15. сезгенүү оорулары.

Каршы көрсөтмөлөр

Бул изилдөө ыкмасы коопсуз, оорутпайт жана каршы көрсөтмөлөрү жок. Бөйрөктүн УЗИсин кош бойлуу аялдарга жана балдарга дайындашат, анткени ультраүн зыянсыз, организмдин ткандарына зыян келтирбейт жана кечиккен кесепеттерди пайда кылбайт.

Бөйрөктүн УЗИсине кантип даярдануу керек?

Бөйрөктү жана бөйрөк үстүндөгү бездерди изилдөө үчүн атайын даярдык талап кылынбайт. Бирок ичегисинде газ көп пайда болгон (метеоризм) бейтаптарга бөйрөктүн жана табарсыктын УЗИсинен 2-3 күн мурун атайын диетаны сактоону сунуштайбыз: рациондон жашылчаларды жана жемиштерди, бүтүн дан эгиндерин, буурчак өсүмдүктөрүн, бүтүн сүттү чыгарып салуу зарыл. Ошондой эле сорбенттерди жана газды айдоочу дарыларды ичүүнү сунуштайбыз.

Табарсыкты жакшыраак көрүү үчүн даярдык талап кылынат. Ультраүн изилдөөсүн толук табарсык менен жүргүзүү керек. Башкача айтканда, УЗИден болжол менен бир саат мурун бейтап бир литрдей суу ичиши жана процедурага табарсыгы толгонун сезген абалда кириши керек. Эгерде буга көңүл бурулбаса, табарсыкты ичегиден айырмалоо мүмкүн болбой калышы ыктымал, жана сапаттуу диагностика жүргүзүүгө мүмкүн болбойт.

Изилдөөнүн убактысы 15-20 мүнөт. Ультраүн диагностикасы дарыгеринин корутундусу изилдөө аяктагандан кийин дароо берилет.

Бөйрөктүн УЗИси - заара-жыныс системасынын ооруларын диагностикалоонун эң жөнөкөй, жеткиликтүү, ишенимдүү жана коопсуз ыкмасы. Биздин диагностикалык борборубузда балдардын жана чоңдордун бөйрөгүнүн абалын ийгиликтүү УЗИ диагностикалоо үчүн баары бар - эксперттик класстагы аппаратура, жогорку деңгээлдеги адис-дарыгерлер, олуттуу практикалык иш тажрыйбасы. MEDXPERT диагностикалык борборунда ошондой эле бөйрөк кан тамырларынын допплерометриясы жүргүзүлөт.

MEDXPERT диагностикалык борбору (УЗИ), Ош ш.